PIA-Ilocos Norte - Ma. Joreina Therese Blanco and Coleen M. Ventura
Contact: This email address is being protected from spambots. You need JavaScript enabled to view it.
LAOAG CITY– Balligi a naangay ti maika-11 a Barangay Nutrition Scholars (BNS) Congress iti Ilocos Norte idi Hulyo 22, 2022.
Nagbalin a guest speaker ni Kendall Pilgrim N. Gatan, agdama nga officer-in-charge iti National Nutrition Council (NNC) iti Region 1. Iti mensahena, impalagipna kadagiti umili ti importansia ken pagsayaatan ti umno a nutrision iti bagi aglalo kadagiti ubbing ken agtutubo.
Inatendaran dagiti BNS iti naduma-duma nga ili iti Ilocos Norte ti nasao a pasken karaman dagiti opisiales ti probinsia a da Bise Gobernador Cecilia Araneta Marcos ken Bokal Medeldorf Gaoat.
Iti panangiyebkasda ti ragsakda iti panakaaramid ti BNS congress iti probinsia, impalagip dagiti nagatendar nga opisiales iti Ilocos Norte ti agtultuloy a panagannad ti publiko kontra iti agdama a mapaspasaran a pandemya.
Kinunada a ngumato-bumaba ti kaso ti coronavirus disease 2019 (COVID-19) iti pagilian isu a masapul a makompleto tunggal umili iti panagpabakuna kontra COVID-19 ken pakairamanan iti panagpabakuna iti booster shots.
Kinunada pay a maragsakanda a nakakita iti dakkel a panagbaba ti kaso iti COVID 19 ditoy pagilian gapu iti panagpabakuna dagiti umili.
Naragsakan ni Darwin Tumbaga, agdama a presidente iti BNS Ilocos Norte, gapu iti balligi a pannakaaramid ti umuna a BNS congress iti probinsia manipud idi nangrugi ti pandemya.
"Naragsakak gapu ta adda tay manen a natipon-tipon ita a kanito kalpasan iti nasurok dua a tawen a saantayo nakapagdidinnanggay gapu iti pandemya, " kinunana.
Kabayatan ti BNS congress, naduma-duma pay a programa ti naisagana ken naaramid para kadagiti BNS frontliners. Nakoronaan a kas reyna ti 2022 BNS Congress ni Her Majesty Queen Rowena Taguicana, maysa a BNS iti Vintar, Ilocos Norte.
